Руслан Мустаев ва Элмурат Тасмурадовни табрийлакмиз!
Бугун Ўзбекистон гимнастика федерациясининг биринчи вице-президенти Руслан Мустаев ҳамда юнон-рум кураши бўйича Рио-2016 Олимпиадаси бронза медали соҳиби, 3 карра жаҳон чемпионати совриндори Элмурат Тасмурадов таваллуд айёмларини нишонлашмоқда.
Руслан Мустаев 1973 йил 12 декабрда туғилган. Фаолиятини ўзбек гимнастикасининг ривожига бағишлаган Руслан Булатович 2007 йилдан буён Ўзбекистон гимнастика федерациясида фаолият олиб бормоқда. Ҳозирги кунда Ўзбекистон гимнастика федерациясининг биринчи вице-президенти сифатида самарали фаолият олиб бормоқда. Ҳамюртимиз халқаро майдонда ҳам юқори мартабага эга бўлиб, Осиё гимнастика иттифоқининг вице-президенти, Халқаро гимнастика федерацияси консуллар кенгашининг аъзоси ҳам саналади.
Элмурат Тасмурадов 1991 йил 12 декабрь куни Тошкент вилоятида таваллуд топган. Маҳоратли курашчимиз фаолияти давомида 5 бор Осиё чемпионатининг олтин медали ва 2 маротаба бронза медалларини ҳам қўлга киритган. Лондон-2012, Рио-2016 ва Токио-2020 Олимпиадаларида юртимиз шарафини муносиб ҳимоя қилди. Бразилияда ўтган Олимпиадада бронза медалини қўлга киритиб, делегациямиз ҳисобига муҳим совринлардан бирини тақдим қилган. Ушбу натижалари эвазига ҳукуматимиз томонидан “Меҳнат шуҳрати” ордени билан тақдирланган.
Ўзбекистон Миллий Олимпия қўмитаси ҳар икки ҳамюртимизни таваллуд айёми билан табриклаб, уларга мустаҳкам саломатлик, узоқ умр тилаб қолади.
