Жавоҳир Синдаров Тошкентда тантанали кутиб олинди
Кипрда ўтказилган шахмат бўйича “Номзодлар турнири”да ғалаба қозонган Жавоҳир Синдаров Тошкентга қайтиб келди. Спортчимиз Ўзбекистон Республикаси Бош вазири, мамлакат шахмат федерацияси раиси Абдулла Арипов, Ўзбекистон Республикаси Президентининг спорт бўйича вакили Одил Абдурахманов, шунингдек, Спорт вазирлиги ва МОҚ раҳбарияти, катта спорт жамоатчилиги томонидан «Ҳумо» халқаро аэропортида тантанали кутиб олинди.
Тадбирда сўз олган расмийлар шахматчимизни эришган муваффақияти билан қутлашди. Хусусан, Абдулла Нигматович Жавоҳир Синдаровни “Меҳнат шуҳрати” ордени билан мукофотлаш ҳақидаги Ўзбекистон Республикаси Президентининг Фармонини ўқиб эшиттирди.
Ўз ўрнида спортчимиз бундай юксак эътирофдан мамнун эканини билдириб ўтди:
“Кутиб олишга чиққан ҳаммага чуқур миннатдорчилик билдираман. Тайёргарликда Президентимизнинг яратган шароитлари ёрдам берди. Ўзбекистон шахматда дунёнинг энг кучли жамоаларидан бири. Балки энг кучлиси ҳамдир. Август ойида юртимизда бўладиган шахмат Олимпиадаси бўлади. Унга катта ҳозирлик кўрамиз. Ундан кейин эътиборимни Гукеш Доммаражу билан кечадиган чемпионликка қаратаман. Унда ғалаба қозониш учун бор кучим билан тайёрланаман. Юртимизда кучли шахматчилар кўп. Насиб қилса, бу йил чемпион бўлиб, келаси йил Нодирбек Абдусатторов билан Жаҳон тожи учун ўйнаш ниятим бор”.
Эслатиб ўтамиз, спортчимиз 14 та ўйинда 10 очко жамғаришга эришган ва турли йўналишларда рекордларни янгилаб, муддатидан аввал мусобақа ғолиблигини расмийлаштирган эди.
