Сузиш бўйича Жаҳон кубоги босқичининг тантанали очилиш маросими ўтказилди
Хабар берганимиздек, бугун пойтахтимизда сузиш бўйича Жаҳон кубоги босқичи бошланди. Куннинг иккинчи ярмида мамлакатимизда илк бор ташкил этилаётган мазкур нуфуздаги мусобақанинг тантанали очилиш маросими бўлиб ўтди.
Тадбирда World Aquatics, Осиё Олимпия кенгаши, Ўзбекистон Миллий Олимпия ва Паралимпия қўмиталари, Uzbekistan Aquatics федерацияси ва бошқа масъул ташкилотлар раҳбарияти иштирок этди.
Сўз олган расмийлар бу турнир мамлакатимиз тарихида сузиш бўйича ўтказилаётган энг катта мусобақа эканига, сув спорти турлари жадал суръатларда ривожланиб бораётганига алоҳида тўхталиб ўтишди. Маросимнинг расмий қисмидан сўнг мусобақанинг кечки дастуридан ўрин олган финал беллашувларига навбат берилди.
Эслатиб ўтамиз, Тошкент мезбонлик қилаётган Жаҳон кубогининг мазкур босқичида дунёнинг 40 та мамлакатидан 230 нафар спортчи ғолиблик учун баҳс олиб бормоқда. Беллашувлар 10 октябрга қадар давом этади.
