Жорий йилнинг энг йирик спорт тадбирларидан бири – Аичи-Нагоя-2026 ёзги Осиё ўйинларига тайёргарлик жараёнини ўрганиш ишлари давом этади. Спорт вазири ўринбосари Шаҳрулло Маҳмудов ҳамда МОҚ раиси ўринбосари Шерзод Ташматов бугун Ўзбекистон теннис, триатлон, замонавий бешкураш ҳамда йилқичилик ва от спорти федерацияларида бўлиб, терма жамоаларнинг режалари билан танишди.

Суҳбат давомида мусобақаларда иштирок этиши кутилаётган спортчиларимиз таркиби, уларнинг имкониятлари, потенциал рақиблари атрофлича таҳлил қилинди. Шунингдек, атлетларимизни Ўйинлар давомида юқори спорт формага кириб боришларини таъминлаш учун улар қатнашадиган мусобақа, маҳаллий ва хорижий ўқув-йиғин машғулотлари юзасидан ҳам фикр алмашилди.

Ўз навбатида, расмийлар тайёргарлик жараёнини янада пухта ишлаб чиқиш, терма жамоалар учун барча шароитларни яратиш юзасидан зарур тавсия ва топшириқларни бериб ўтишди.