🏆 Милан-Кортина-2026 қишки Олимпия ўйинлари ниҳоясига етди

Италиянинг Милан ва Кортина-д’Ампеццо шаҳарлари мезбонлик қилган XXV қишки Олимпия ўйинлари ўз якунига етди. 6-22 февраль кунлари бўлиб ўтган мусобақада 92 жамоадан 3000 нафарга яқин спортчи иштирок этди. Якунда Норвегия делегацияси 18 та олтин, 12 та кумуш ва 11 та бронза медаллари билан умумжамоа ҳисобида биринчи ўринни қўлга киритди. Шунингдек, АҚШ, Нидерландия, Италия ва Германия давлатлари кучли бешликдан жой олишди.

🥊 Софияда «Странжа» турнири бошланмоқда

Бугун Болгария пойтахтида бокс бўйича “Кичик жаҳон чемпионати” номини олган «Странжа» халқаро мусобақаси старт олади. 77-бор ўтказилаётган мазкур турнирда Ўзбекистон эркаклар ва аёллар терма жамоалари катта таркибда иштирок этмоқда. 1 март кунигача давом этадиган беллашувларда жами 30 нафар боксчимиз медаллар учун баҳс олиб боради.

🤺 Қиличбозларимиз Осиё чемпионатида иштирок этишмоқда

Шу кунларда Индонезия пойтахти Жакарта шаҳрида қиличбозлик бўйича ўсмирлар ва ёшлар ўртасидаги Осиё чемпионати бўлиб ўтмоқда. 27 февралга қадар давом этадиган мусобақада Ўзбекистон терма жамоаси вакиллари ҳам совринли ўринлар учун кураш олиб боришмоқда. Дастурга кўра, бугун йигитлар сабля ва шпага, қизлар эса рапира қуролида жамоавий йўналишда совринли ўринлар учун беллашишяпти.