Хитойнинг Харбин шаҳрида IX қишки Осиё ўйинлари ўз якунига етди. 7-14 февраль кунлари ўтказилган мусобақада Ўзбекистон делегацияси 26 йиллик танаффусдан кейин яна олтин медалга сазовор бўлди.

Фигурали учувчиларимиз Дмитрий Чигирев ҳамда Екатерина Гейниш жуфтлик дастурида қойилмақом чиқишлари билан биринчи бор ушбу йўналишда шоҳсупанинг энг юқори поғонасига кўтарилишди. Янада аҳамиятлиси, делегациямиз мазкур олтин медаль билан умумжамоа ҳисобида Хитой, Корея Республикаси, Япония ва Қозоғистондан сўнг бешинчи ўринни эгаллади.

Ўзбекистон Миллий Олимпия қўмитаси барча юртдошларимизни Харбинда қайд этилган тарихий ғалаба билан самимий қутлайди ҳамда спортчиларимизга Милан-Кортина-2026 қишки Олимпия ўйинларига тайёргарлик йўлида улкан омад ва муваффақиятлар тилайди.