МОҚ раҳбарияти нигоҳида Сирдарё вилоятининг спорт таълим муассасалари фаолияти
Отабек Умаров бошчилигидаги МОҚ раҳбариятининг ҳудудлардаги спорт инфратузилмасини ўрганиш бўйича олиб бораётган ишлари давом этади. Бугун расмийлар Сирдарё вилоятидаги спорт муассасаларини кўздан кечиришди. Ўрганиш жараёнида МОҚ раҳбариятига вилоят ҳокими Акмалжон Маҳмудалиев ҳамроҳлик қилди.
Дастлабки манзил Сирдарё ва Сайхунобод туманларидаги спорт мактаблари бўлди. Қайд этиш жоиз, ҳозирда Россиянинг ЦСКА клубида фаолият олиб бораётган футбол бўйича Ўзбекистон миллий терма жамоаси аъзоси Аббосбек Файзуллаев Сайхунобод спорт мактабида футболнинг дастлабки сир-асрорларини ўрганган. Суҳбат давомида мутасаддиларга ҳар бир йўналишда Аббосбекдек иқтидор эгаларини топиш, селекцияга кўпроқ аҳамият қаратиш борасида тавсиялар берилди.
Мутасаддилар ўрганиш ишлари давомида ёш спортчиларнинг шуғулланишлари учун яратилган шароитлар билан танишиб, муассасаларнинг моддий-техник базасини кўздан кечиришди. Шунингдек, ўйин спорт турлари ва енгил атлетика, гимнастика ва сув спорти турларига ихтисослашган спорт мактабларида ҳам бўлишди. Ҳар бир мактабдаги ташрифда машғулотлар жараёни кўздан кечирилди ва ёш спортчилар билан мулоқот қилинмоқда.
Кун давомида Гулистон Олимпия ва Паралимпия спорт турларига тайёрлаш маркази ҳамда вилоят футбол академияси ҳам кўздан кечирилди. Якунда Спорт вазири Адҳам Икрамов, Акмалжон Маҳмудалиев бошчилигидаги вилоят ҳокимлиги мутасаддилари, федерацияларнинг ҳудудий вакиллари билан янги режаларга бағишланган йиғилиш ўтказилди. Унда Лос-Анжелес-2028 ёзги Олимпия ўйинларига тайёргарлик кўриш учун терма жамоаларга жалб этиладиган сирдарёлик спортчилар рўйхати кўриб чиқилиб, уларни ижтимоий қўллаб-қувватлаш ва шуғулланишлари учун барча шароитларни яратиш борасида тавсиялар берилди.
