Оғир атлетикачиларимиз сўнгги йиғинга киришишди
Хабар берганимиздек, куни кеча оғир атлетика бўйича Ўзбекистон терма жамоаси Токио-2020 Олимпиадасига тайёргарлик доирасида сўнгги ўқув-машғулот йиғинига жўнаб кетган эди. Терма жамоамиз мўлжалланган Украинанинг Каменец-Подольский шаҳрига етиб борди.
Йиғинга 8 нафар спортчи, 2 мураббий ва 1 массажчи жалб қилинган. Машғулотлар мураббийлар штабининг режаси асосида олиб борилмоқда. Аввал хабар берганимиздек, бу йиғиндан сўнг жамоамиз 20 июль куни Украинадан тўғри Японияга йўл олишади. Шу боис кунига 2 маҳал олиб борилаётган мазкур машғулотларнинг аҳамияти катта.
Токио-2020 Олимпиадасида иштирок этмайдиган вакилларимизнинг йиғини 29 июль кунига қадар давом этади. Маълумот учун, бўлажак Олимпиадада Акбар Жўраев, Адҳамжон Эргашев, Муаттар Набиева ҳамда Кумушхон Файзуллаева юртимиз шарафини ҳимоя қилишади.
