Ўзбекистон делегацияси янги ғалабалар сари Франция томон йўл олди
Ўзбекистон расмий делегацияси 4 йилликнинг энг муҳим старти – Париж-2024 XXXIII ёзги Олимпия ўйинларида иштирок этиш учун Франция пойтахтига жўнаб кетди. Делегация Ислом Каримов номидаги Тошкент халқаро аэропортида кузатиб қўйилди. Юртдошларимиз янги орзу ва умидлар билан “Dream Liner” бортида Париж томон йўл олди.
Маълумот учун, бўлажак Олимпия ўйинлари расман 26 июль – 11 август кунлари бўлиб ўтади. Ўзбекистон делегацияси ўз иштирокини эртага футболчиларимизнинг Испанияга қарши ўйини билан бошлайди.
Бўлажак Олимпия ўйинларига Ўзбекистон делегацияси ўз тарихида илк бор 19 спорт турида 90 нафар спортчи билан 75 та лицензия қўлга киритган. Ҳамюртларимиз футбол, камондан отиш, сувга сакраш ва аёллар кураши дастурларида Олимпия ўйинларида дебют қилади.
Фурсатдан фойдаланиб, олдинда турган масъулиятли мусобақа ҳар бир спортчимизга омад ва зафарлар ёр бўлсин деб, жонажон Ватанимизга тарихий натижалар билан қайтишларини тилаб қоламиз.
