Париж-2024 ёзги Олимпия ўйинларида иштирок этадиган Ўзбекистон делегациясининг ишчи гуруҳи Франция пойтахтига етиб борди. МОҚ раиси ўринбосари Шерзод Ташматов бошчилигидаги мутахассислар расмий делегация етиб боргунга қадар барча ташкилий ишларни амалга оширади.

Ишчи гуруҳ Ташкилий қўмита масъуллари билан учрашиб, кўплаб масалаларни ҳал қилмоқда. Ўзбекистон делегацияси учун ажратилган бино атлетларимизни кутиб олиш учун тайёр. Қайд этиш жоиз, Париж бўлажак Олимпия ўйинларига профессионал тарзда тайёрлангани ҳар қадамда кўриниб турибди.

Биринчилардан бўлиб иштирокларини бошлайдиган футбол, академик эшкак эшиш ва камондан отиш бўйича терма жамоаларимиз айни пайтда Олимпия шаҳарчасига жойлашиб улгурган.