Париж-2024 лицензиатлари: Осиё ўйинлари ғолиби Анна Пракатень
Франция пойтахтида юртимиз шарафини ҳимоя қиладиган яна бир атлетимиз билан танишамиз. Академик эшкак эшиш бўйича Ўзбекистон терма жамоаси аъзоси Анна Пракатень бугун эътиборимиз марказида.
Пракатень Анна Витальевна 1992 йил 6 сентябрь куни Минск шаҳрида (Беларусь) таваллуд топган. Аввалги терма жамоаси сафида Токио-2020 ёзги Олимпия ўйинларида кумуш медални қўлга киритган. 2023 йилдан Ўзбекистон терма жамоаси аъзоси. Мураббийи Вячеслав Дидрих. Яккалик дастурига ихтисослашган Пракатень 2023 йил Сербияда ўтган жаҳон чемпионатида юртимиз шарафини ҳимоя қилган. Ханчжоу-2022 Осиё ўйинларида қитъамизда тенгсиз эканини намойиш этиб, олтин медалга сазовор бўлди.
Пракатень апрель ойида Жанубий Кореяда ўтган қитъавий лицензион турниридаги муваффақиятли иштироки орқали Париж-2024 ёзги Олимпия ўйинлари йўлланмасига эга чиққан.
