Париж-2024 лицензиатлари: Марафон устаси Шоҳруҳ Давлатов
Ёзги Олимпия ўйинларида барча дастурдаги чемпионлардан кўра марафон йўналишидаги ғолиб ва совриндорларга алоҳида эътибор кўрсатилиб, уларни тақдирлаш Ўйинларнинг ёпилиш маросими давомида ўтказилади. Бугун Париж-2024 Олимпиадасида мазкур йўналишда юртимиз шарафини ҳимоя қиладиган атлет Шоҳруҳ Давлатов ҳақида суҳбатлашамиз.
Давлатов Шоҳруҳ Саъдулло ўғли 1996 йил 7 март куни Сурхондарё вилояти Сараосиё туманида туғилган. 2017 йил Ўзбекистон терма жамоаси таркибидан жой олган. Мураббийлари Камолиддин Рўзимуҳаммедов ҳамда Наталья Холдорова. Тошкент, Иссиқ-кўл, Олма-ота ва бир қатор шаҳарларда анъанавий тарзда ўтказиб келинадиган халқаро марафонларда мунтазам равишда ғолиб ва совриндорлар қаторидан жой олиб келади.
Давлатов 2023 йил 3 декабрь куни Испанияда ўтган “Valencia Marathon Trinidad Alfonso” марафонида (42 км, 195 метр) 2 соат, 7 дақиқаю 2 сония натижа қайд этиб, Париж-2024 нормативини бажаришга муваффақ бўлган.
