Париж-2024 Олимпиадаси сари бир қадам қолди!
Ўзбекистон 3:0 Ҳиндистон
Голлар: Н.Қудратова 2ʼ, Л.Карачик 51ʼ, 83ʼ
Мидори Хонда бошчилигидаги футбол бўйича Ўзбекистон аёллар терма жамоаси Париж-2024 Олимпиадаси йўлида ҳал қилувчи 3-босқичга йўл олди. «С» гуруҳидан ўрин олган жамоамиз 6 очко билан энг яхши натижа қайд этган 2-ўрин соҳиби сифатида кейинги даврага ўтди. Гуруҳдаги сўнгги турда Ҳиндистон 3:0 ҳисобида мағлубиятга учратилди.
Ҳал қилувчи босқичга Австралия, КХДР, Япония ва Ўзбекистон жамоалари йўл олди. «C» гуруҳида 2-ўринни эгаллаган жамоамиз регламентга мувофиқ, «А» гуруҳи ғолиби Австралия билан тўқнаш келади. Нариги жуфтликда эса КХДР ва Япония жамоалари баҳс олиб боришади. Ушбу ўйинлар келаси йилнинг 24-28 февраль кунлари уй-сафар тизимида бўлиб ўтади. Ғолиб жуфтликлар Париж-2024 Олимпиадасига йўлланма олади. Ҳал қилувчи босқичда ҳам қизларимизга омад ва зафарлар тилаймиз!
