Оғир атлетикачи йигитларимиз медаллар жамғариш бўйича иккинчи бўлишди
Саудия Арабистонида оғир атлетика бўйича жаҳон чемпионати ўз якунига етди. Париж-2024 Олимпиадаси йўлида лицензион характерга эга бўлган мазкур мусобақада Ўзбекистон терма жамоаси муносиб қатнашди.
Чемпионат давомида спортчиларимиз 4 та олтин, 2 та кумуш ва 1 та бронза медалларини жамғаришди. Барча медалларни йигитларимиз келтиришди. Бу орқали эркаклар терма жамоамиз медаллар жамғариш бўйича Хитойдан сўнг иккинчи, очколар классификацияси бўйича эса Арманистон, Хитой, Эрон, Колумбиядан сўнг бешинчи поғонадан жой эгаллади. Шоҳсупага кўтарилган атлетларимиз:
Олтин медаль:
-81 кг: Муҳаммадқодир Тоштемиров (даст кўтариш)
-109 кг: Акбар Жўраев (даст кўтариш)
-109 кг: Руслан Нурудинов (силтаб кўтариш)
-109 кг: Акбар Жўраев (икки кураш)
Кумуш медаль:
-109 кг: Акбар Жўраев (силтаб кўтариш)
-109 кг: Руслан Нурудинов (икки кураш)
Бронза медаль:
-81 кг: Муҳаммадқодир Тоштемиров (икки кураш)
Ўзбекистон Миллий Олимпия қўмитаси Ўзбекистон оғир атлетика федерацияси, спортчи ва мураббийларимизни ушбу натижа билан қутлаб, уларнинг келгуси фаолиятида ҳам омад тилаб қолади. Энди терма жамоамиз Осиё ўйинларида иштирок этиш учун Саудия Арабистонидан Хитойга йўл олади.
