25 Август 2023
1198
Тонгни хушхабар билан қарши оламиз: Ўзбекистон Париж-2024 ёзги Олимпия ўйинларига илк йўлланмани қўлга киритди!
Испаниянинг Валенсия шаҳрида ўтаётган бадиий гимнастика бўйича жаҳон чемпионатидан ажойиб янгилик. Ҳамюртимиз Тахмина Икромова Ўзбекистон делегацияси учун Париж-2024 ёзги Олимпия ўйинларининг илк йўлланмасини тақдим қилди.
Юртдошимиз кўпкураш дастурида 4 машқ якунидан сўнг 124.200 балл билан 9-ўринни эгаллади. Икромова бу билан Париж-2024 Олимпиадасига йўлланма берувчи 14 таликдан жой олди. Шунингдек, спортчимиз булава ва тасмадаги машқда финал босқичига йўл олди.
Ўзбекистон Миллий Олимпия қўмитаси барча юртдошларимизни, қолаверса, мамлакат гимнастика федерацияси, спортчимиз ва уни тайёрлаган мураббийларни ушбу натижа билан самимий қутлайди!
