Ўзбекистон делегацияси “LONGINES GLOBAL Champions Tour 2023” мусобақасида иштирок этди
20-26 июнь кунлари Баҳромжон Газиев бошчилигидаги Ўзбекистон йилқичилик ва спорти федерацияси мутасаддилари Франциянинг Париж шаҳрида ташкил этилган нуфузли “LONGINES GLOBAL Champions Tour 2023” мусобақасида иштирок этишди. Тадбир давомида ҳамюртларимиз мусобақалар ташкил этиш ва зотдор отларни кўпайтириш каби йўналишларда қатор истиқболли келишувларга эришишди.
Мазкур тадбирда Ўзбекистон делегациясига мамлакатимизнинг Франциядаги Фавқулодда ва Мухтор элчиси Сардор Рустамбоев ҳамроҳлик қилди. Б.Газиев сафар давомида машҳур Эйфель минорасининг муҳандиси Густав Эйфелнинг набираси, Франция от спорти федерацияси вице-президенти Виржини Купер-Эйфель билан учрашди. Суҳбатда пойтахтимиздаги “Universal Horses Stable” от спорти мажмуасида ҳам нуфузли мусобақаларни ўтказиш бўйича Франция тажрибасини ўрганиш, Париждаги машҳур “Saint Laurent” модалар уйининг унга ҳомийлик қилиши бўйича фикр алмашилди. Шунингдек, 2025-2026 йиллар давомида мамлакатимизда “Global Tour” мусобақаларини ўтказиш бўйича ҳам келишувга эришилди.
“LONGINES GLOBAL Champions Tour 2023” турнири ҳақида тўхталадиган бўлсак, баҳслар Парижнинг рамзи бўлмиш Эйфель минорасининг олдидаги Версал майдонида ташкил этилди. Қайд этиш жоиз, ушбу мажмуа 1 йилдан сўнг Париж-2024 ёзги Олимпия ўйинларида от спорти бўйича ўтадиган баҳсларга мезбонлик қилади. Қизиқарли курашларга бой ўтган баҳсларда германиялик 2 карра Олимпиада совриндори Кристиан Альман ғалаба қозонди. Баҳромжон Газиев ушбу чавандозни муваффақият билан қутлаб, уни юртимизда ўтадиган мусобақаларга таклиф қилди.
