Миллатлар кубогида конкурчиларимизнинг навбатдаги ғалабаси
Тошкентда конкур бўйича “Grand Prix Eurasia league Tashkent 2023” мусобақасининг иккинчи кун беллашувлари якунига етди. “Universal Horses stable” мезбонлик қилаётган мусобақанинг ортда қолган ушбу кунида барчанинг диққат-маркази 150 см баландликдаги тўсиқлардан сакраш дастурига қаратилди.
Баҳслар якунигача барчани катта ҳаяжонда ушлаб турган дастурда Хуршиджон Алимжонов ғалаба қозонди. “Champions League” тулпори билан ҳаракат қилган Алимжонов 91.45 сония қайд этишга эришди. Иккинчи ўрин «Kalecco» билан ҳаракат қилган Саидамирхон Турғунбоевга насиб этган бўлса, “Bazar de Ruet” оти Аъзам Толиббоевга учинчи ўринни тақдим қилди. Аҳамиятлиси, кейинги поғоналар ҳам юртдошларимиз Нуржан Туякбаев (“Kvintes НВ”) ва Бекзод Қурбоновга (“Mats VG”) насиб этди. Беллашувлар давом этади.
