Сайтнинг эски версияси

Ёшлар сиёсати ва спорт вазирлигида “Тошкент-2025” ёшлар Осиё ва Параосиё ўйинлари, шунингдек, Ханчжоу-2022 Осиё ўйинларига олиб борилаётган тайёргарлик бўйича йиғилиш ўтказилди. Вазир Адҳам Икрамов олиб борган ушбу тадбирда вазирлик ва МОҚ раҳбарияти, Республика олий спорт маҳорати мактабларининг мутасаддилари иштирок этишди.

Йиғилиш “Тошкент-2025” ёшлар Осиё ва Параосиё ўйинларига кўрилаётган ишлар муҳокамаси билан бошланди. Мулоқот давомида мусобақа билан боғлиқ барча йўналишлар, хусусан, ўтказиладиган саналар, дастурга киритиладиган спорт турлари, транспорт-логистика тизими, мусобақа рамзи ва бошқа атрибутлар учун конкурс эълон қилиш, беллашувлар ўтказиладиган ва машғулот учун ажратиладиган объектларни белгилаб олиш масалалари атрофлича муҳокама қилинди. А.Икрaмов ҳар бир мавзу бўйича алоҳида тўхталар экан, вазифалар профессионал даражада бажарилиши лозимлигини таъкидлади. Шунингдек, федерация масъулларига Олий спорт маҳорати мактаблари билан мусобақа дастурига таклиф этилган спорт турларини яна бир карра кўриб чиқиш, шу асосда беллашувлар куни ва спорт объектларини тақсимлаш бўйича аниқ вазифалар белгиланди.

Тадбир давомида МОҚ Бош котиби Ойбек Касимов “Тошкент-2025” ёшлар Осиё ва Параосиё ўйинларини ўтказиш бўйича ташкил этиладиган дирекция тақдимотини ўтказди. Кун тартибидаги ушбу мавзу якунида мусобақа дастуридан миллий спорт турларининг жой олишига аҳамият қаратиш, текбол ва бошқа кўргазмали спорт турлари таркибини шакллантириш бўйича топшириқ берилди.

Йиғилишда Ханчжоу-2022 Осиё ўйинларига кўрилаётган тайёргарлик ҳам атрофлича кўриб чиқилди. Бу борада МОҚ раиси ўринбосари Шерзод Ташматов терма жамоаларнинг олиб бораётган тайёргарлиги, мусобақада иштирок этиши кутилаётган спорт турлари, медаллар жамғариш бўйича тахминий ҳисоб-китоб маълумотларини акс эттирган тақдимотни намойиш қилди. Якунда барча спорт турларининг тайёргарлик режасини яна бир карра таҳлил қилиш, спортчилар контингентини кўриб чиқиш лозимлиги таъкидланди.