Шу кунларда спорт курашлари бўйича Ўзбекистон терма жамоаси Тошкент вилоятининг Угом оромгоҳида навбатдаги ўқув-машғулот йиғинини олиб бормоқда. Жорий йиғин келаси ой Қозоғистонда ўтадиган Осиё чемпионати тайёргарлигига қаратилган. Бугун МОҚ раиси ўринбосари Шерзод Ташматов спортчиларимизнинг машғулотларини кўздан кечирди.

Қайд этиш жоиз, бу йил курашчиларимизни қитъа биринчилигидан ташқари Осиё ўйинлари, Париж-2024 Олимпиадаси учун лицензион жаҳон чемпионати каби йирик мусобақалар кутиб турибди. Шу боис, ҳар бир йиғинни максимал даражада ўтказиш, спортчиларнинг тайёргарлигини кучайтириш асосий даражага кўтарилади.

Шерзод Ташматов ўрганиш давомида атлетлар учун яратилган шароитлар билан яқиндан танишди. Спортчиларнинг машғулотини кузатиб, улар билан тайёргарлик ҳақида суҳбатлашди. Шунингдек, ўрганиш якунида мураббийлар штаби билан ҳар бир спортчи устида индивидуал ишлаш, асосий рақибларни ҳар томонлама ўрганиш бўйича қўшимча тавсиялар бериб ўтди.