Дэвис кубогига тайёргарлик муҳокама қилинди
3-5 февраль кунлари теннис бўйича Дэвис кубоги жаҳон саралаш босқичининг плей-офф босқичи баҳслари бўлиб ўтади. Мазкур босқич доирасида 3-4 февраль кунлари Ўзбекистон ва АҚШ терма жамоалари Тошкентда ўзаро баҳс олиб боради. Ёшлар сиёсати ва спорт вазири Адҳам Икрамов бошчилигидаги ишчи гуруҳ бўлажак мусобақага тайёргарлик масалаларини муҳокама қилди. Шунингдек, унда МОҚ Бош котиби Ойбек Касимов, Ўзбекистон теннис федерацияси Бош котиби Ирода Тўлаганова, Республика Олимпия захиралари теннис мактаби (РОЗТМ) ва федерация мутасаддилари иштирок этишди.
Адҳам Икрамов учрашув жаҳон теннис ҳамжамиятининг эътиборида бўлгани боис уни ҳар томонлама пухта ўтказиш лозимлигини алоҳида урғулади. Қайд этиш жоиз, теннисчиларимиз мунтазам равишда Дэвис кубогининг саралаш босқичида иштирок этиб келишади. Шу боис ташкилотчилик борасида катта тажриба мавжуд. Вазир бўлажак ўйинга замонавий ёндашувда тайёрланиш, ташриф буюрадиган терма жамоа, халқаро федерация вакиллари учун барча қулайликларни яратиш бўйича алоҳида топшириқ берди.
