“Universal Jumping Agro” замонавий қиёфа очмоқда
Пойтахтимиздаги муҳташам “Universal Jumping Agro” от спорти клубининг имкониятларини янада ошириш, унинг барча халқаро талабларга жавоб беришини таъминлаш мақсадида мажмуада қайта таъмирлаш ишлари кетмоқда. Президентимизнинг 2021 йил қабул қилинган “Йилқичилик ва от спортини янада ривожлантириш ҳамда замонавий бешкураш ва поло спорт турини оммалаштириш бўйича қўшимча чора-тадбирлар тўғрисида”ги ПҚ-5024 Қарор ижросига мувофиқ олиб борилаётган жараён халқаро экспертлар билан ҳамкорликда йўлга қўйилган.
1-3 ноябрь кунлари Халқаро от спорти федерацияси (FEI) номидан ташриф буюрган эксперт Сергей Буйкевич мажмуада олиб борилаётган ишлар билан яқиндан танишди. Ташриф давомида унга Ўзбекистон йилқичилик ва от спорти федерацияси раиси Баҳромжон Газиев, федерация бош котиби Нодирбек Ибрагимов ҳамда терма жамоа бош мураббийи Бекзод Қурбонов ҳамроҳлик қилишди.
Қайд этиш жоиз, халқаро эксперт комплексда олиб борилаётган ишларга юқори баҳо берди. Шунингдек, у мажмуанинг Марказий Осиёдаги энг яхши от спорти клуби эканини алоҳида таъкидлади. Сергей Буйкевич ташриф давомида комплекснинг янада қулай ва шинам бўлиши борасида ўз таклиф ва тавсияларини бериб ўтди.
Ўзбекистон йилқичилик ва от спорти федерацияси 2023 йил Париж-2024 Олимпия ўйинларига йўлланма берадиган квалификацион мусобақалардан бирини ушбу аренада ўтказиш учун халқаро федерацияга ариза топширган. Қурилиш ишлари якунланганидан сўнг мажмуадан 2025 йил Тошкентда ўтадиган ёшлар Осиё ўйинлари доирасидаги от спорти баҳсларини ўтказишда ҳам фойдаланиш мумкин бўлади.
