Терма жамоаларнинг Ханчжоу-2022 Осиё ва Париж-2024 Олимпия ўйинларига олиб бораётган тайёргарлиги кўриб чиқилди
Айни пайтда барча терма жамоаларимиз яқинлашиб келаётган Ханчжоу-2022 Осиё ва Париж-2024 Олимпия ўйинларига катта тайёргарлик олиб бормоқда. Бугун Миллий Олимпия қўмитасида мазкур ҳолат қай даража йўлга қўйилгани, шунингдек, 2023 йил тақвим режасидан ўрин олган мусобақалар ва уларнинг сметасини шакллантириш масалаларига бағишланган йиғилиш бўлиб ўтди. Тадбирни Спортни ривожлантириш вазирининг ўринбосари Шаҳрулло Маҳмудов ҳамда МОҚ раиси ўринбосари Шерзод Ташматов олиб боришди. Унда, шунингдек, Қўмита қошидаги Республика спорт тиббиёти илмий-амалий маркази директори Камол Сирожитдинов, федерация ва ассоциациялар масъуллари иштирок этишди.
Даставвал, Шаҳрулло Шарипович ортда қолаётган йил якунлари бўйича қисқача тўхталиб, 2022 йил ўзбек спорти учун тарихий натижаларга бой бўлгани, келаси йил бундан ҳам юқори ютуқларга эришиш учун ҳаракат қилинишини билдирди. Йиғилишда мутасадди раҳбарлар ҳар бир федерация масъуллари билан терма жамоаларнинг бугунги кундаги вазияти, Осиё ўйинларига жалб қилинаётган таркиб, уларнинг тайёргарлик режаси, спортчиларнинг ҳолати бўйича атрофлича фикр алмашишди.
Шерзод Ташматов терма жамоаларнинг янада юқори натижа кўрсатиши, атлетларнинг жисмоний ва функционал тайёргарлигини ошириш мақсадида кучли хорижлик мутахассисларни жалб қилиш бўйича ўз тавсияларини бериб ўтди. Шунингдек, суҳбат давомида оммавий спорт тарғиботини кучайтириш, спортчиларнинг саломатлигини назоратга олиш, мунтазам равишда уларни тиббий кўрикдан ўтказиб бориш бўйича қўшимча кўрсатма берди.
Йиғилиш кун тартибига мувофиқ, учрашув давомида янги йил учун тақвим режаларни ишлаб чиқиш масаласи ҳам кўриб чиқилди. Бунда ҳар бир масъулдан тақвимни пухта шакллантириш, йил давомида унга ўзгартириш киритилган тақдирда вақтида огоҳлантириб бориш, спорт тадбирларини ўтказиш учун ажратиладиган маблағларни самарали йўналтириш сўралди.
