Байрам арафасидаги чиройли анъаналар давом этади
Маълумки, ҳар йили жонажон ватанимизнинг энг улуғ, энг азиз байрами ҳисобланмиш Мустақиллик куни арафасида давлатимизнинг эътибори ва қўллаб-қувватлаши билан спортимиз фахрийларига юксак эҳтиром кўрсатиб келинади. Мана шундай эзгу ташаббус анъанаси бу йил ҳам давом эттирилиб, умрларининг катта қисмини ўзбек спортининг бугунги ривожига сарф қилган фахрийларимизга пул мукофотлари топширилди.
Миллий Олимпия қўмитасида ўтган тадбирда Спортни ривожлантириш вазирининг ўринбосари Абдулла Аслонов, МОҚ Бош котиби Ойбек Касимов, шунингдек, Баҳодир Махситов бошчилигидаги бир гуруҳ фахрийлар иштирок этишди.
Тадбирда сўз олганлар давлатимиз томонидан Мустақиллик байрами арафаси ҳар бир фуқароларимизга ўзгача шукуҳ улашиш мақсадида катта иш олиб борилаётгани, хусусан, кексаларнинг ҳолидан хабар олиниб, уларни қўллаб-қувватлаш кўзда тутилганини алоҳида таъкидладилар.
Шундан сўнг 42 нафар фахрийга Спортни ривожлантириш вазирлиги ва Миллий Олимпия қўмитасининг байрам совғалари топширилди. Якунда сўз олган фидойиларимиз уларга кўрсатилаётган бундай эътибордан мамнун эканликларини, келажакда ҳам спортимиз ривожи, жонажон Ватанимиз равнақи учун хизмат қилишга тайёр эканликларини билдиришди.
