Андрей Абдувалиевни табриклаймиз!
Бугун Ўзбекистон енгил атлетика федерацияси раисининг ўринбосари, Олимпиада чемпиони Андрей Абдувалиев ўз таваллуд айёмини нишонламоқда.
Андрей Ҳакимович Абдувалиев 1966 йил 30 июнь куни туғилган. Енгил атлетиканинг босқон улоқтириш йўналиши бўйича Барселона-1992 Олимпия ўйинлари чемпиони. Андрей Ҳакимович, шунингдек, 1993 йил Штутгарт ва 1995 йил Гётеборгда ўтган жаҳон чемпионатлари ғолиби, Осиё чемпиони ва Осиё ўйинлари совриндори ҳам саналади.
Хизмат кўрсатган спорт устаси унвонини қўлга киритган Андрей Абдувалиев 2000 йилда спортчилик фаолиятини тугатган. Бир неча йил мамлакат енгил атлетика федерацияси раиси сифатида самарали меҳнат қилган. Ҳозирда Ўзбекистон енгил атлетика федерацияси раисининг ўринбосари ва Осиё енгил атлетика ассоциацияси вице-президенти лавозимларида иш олиб бормоқда. 2021 йил давлатимиз томонидан "Содиқ хизматлари учун" медали билан тақдирланган.
Ўзбекистон Миллий Олимпия қўмитаси Андрей Абдувалиевни бугунги таваллуд айёми билан табриклаб, у кишига узоқ умр ва сиҳат-саломатлик тилаб қолади.
