Италия от спорти федерацияси билан ҳамкорлик янги босқичга чиқмоқда
Ўзбекистон йилқичилик ва от спорти федерацияси раиси Баҳромжон Газиев Италия от спорти федерацияси президенти Марко Ди Паолонинг таклифига биноан Рим шаҳрида 89-бор ташкил этилган “CSIO Piazza di Siena - Master fratelli d'Inzeo” турнирида меҳмон бўлди.
Баҳромжон Газиев сафар доирасида қатор расмий учрашувлар ўтказди. Жумладан, Ўзбекистон Республикасининг Италиядаги Фавқулодда ва Мухтор элчиси Отабек Акбаров, Италия от спорти федерацияси президенти Марко Ди Паоло, Федерация Бош котиби Симоне Перилло, Италияда от полосини ривожлантириш бўлими ва ушбу спорт жиҳозлари, анжомларини ишлаб чиқарувчи йирик компания мутасаддилари билан истиқболли режаларни муҳокама қилди.
Музокаралардан томонларнинг ҳамкорлигини янада кучайтириш, шунингдек, йилқичилик, от спорти ва поло бўйича соҳадаги илғор ҳакам ва мураббийларни тайёрлаш, мутахассислар малакасини ошириш каби мавзулар ўрин олди.
Юқори сифатли анжомлардан фойдаланиш от спортида ҳам катта натижаларга эришишда аҳамиятли жиҳатлардан бири ҳисобланади. Бу борада сифатли кийим ва пойафзал ишлаб чиқарувчи “Loro Piana” ва “DeNiro BootCo”, хавфсизлик узангилари ишлаб чиқарувчи “SAFE RIDING” каби бренд мутасаддилари билан ушбу компания товарларини мамлакатимиз бозорларига киритиш бўйича ҳамкорлик режалари белгиланди.
