ООК вице-президенти Отабек Умаровни табриклаймиз!
Бугун Осиё Олимпия кенгаши вице-президенти Отабек Умаров таваллуд айёмини нишонламоқда.
Отабек Умаров 1984 йил 15 май куни таваллуд топган. Узоқ вақтдан бери ўзбек спорти ривожига улкан ҳисса қўшиб келаётган мутахассислардан саналади. Жумладан, Ўзбекистон триатлон федерацияси раиси, ММА ассоциацияси асосчиси ва биринчи раҳбари сифатида юртимизда ушбу спорт турлари, хусусан, оммавий спорт тарғиботини янги босқичга олиб чиқди. Зеро, Тошкентда илк бор мазкур йўналиш бўйича GFC-20 турнири, Ўзбекистон чемпионати ва бошқа йирик турнирларнинг ўтказилиши юқоридаги фикрларимизни тасдиқлайди.
Отабек Муҳаммадалиевич 2020 йил Ўмоннинг Маскат шаҳрида ўтган Осиё Олимпия кенгашининг Бош Ассамблеясида ташкилотнинг вице-президенти этиб сайланди. Унинг мазкур лавозимга сайланиши пойтахтимизнинг 2025 йил ёшлар Осиё ўйинларини қабул қилиши билан боғлиқ. Ишонамизки, Отабек Умаров ООК вице-президенти сифатида Янги Ўзбекистоннинг салоҳиятини бутун дунёга кўрсатишда, мамлакатимиз ва Марказий Осиёда Олимпия ҳаракати тарғиботининг янада кучайишида жонбозлик кўрсатади. Қайд этиш жоиз, жорий йил мамлакатимизда Осиё Олимпия кенгаши Ижроия қўмитасининг йиғилиши илк бор Тошкентда ўтказилишида унинг хизмати катта.
Фурсатдан фойдаланиб, Ўзбекистон Миллий Олимпия қўмитаси Отабек Умаровни таваллуд айёми билан самимий табриклаб, унга узоқ умр ва сиҳат-саломатлик тилаб қолади.
