Достон Ёқубов: “Бу ҳали бошланиши. Янги Ўзбекистонимизга янги ғалабалар тақдим қиламан”
Оғир атлетикачимиз Достон Ёқубов бугун кун қаҳрамонига айланди. 2 йиллик танаффусдан кейин катта спортга қайтган полвонимиз -67 кг вазн тоифасида жаҳон чемпионига айланди. Чемпионимиз мусобақадан сўнг ўз фикрлари билан ўртоқлашди.
“Авваламбор, Президентимизга, Туризм ва спорт вазирлиги, Миллий Олимпия қўмитасига, Касаба уюшмалари федерациясига, ушбу аренага қўллаб туриш учун келган мухлислар ва оиламга катта раҳмат айтаман. Уларнинг қўллаши билан шундай ғалабани қўлга киритдим. Мураббийларим мен билан ўқув-машғулот йиғинларида камчиликларим устида тинимсиз ишлашди ва ҳозир унинг натижасини кўриб турибмиз. Бу ҳали бошланиши. Келгусида бунданда катта ғалабалар билан Янги Ўзбекистонимизга янги ғалабалар тақдим қиламан”, – деди Достон Ёқубов.
Шунингдек, беллашувларда кичик бронза медали соҳиби бўлган Адҳамжон Эргашев ҳам бугунги иштирокидан мамнун эканини билдирди:
“Токио-2020 Олимпиадасидан сўнг илк стартим бўлди. Бундан каттароқ натижа кутган бўлсам ҳам, умумий иштирокимдан кўнглим тўлди. Яна бир нарсани алоҳида айтмоқчиманки, аренага келган мухлисларимиз бизга шунчаки ажойиб атмосфера тақдим қилиб туришди. Илгари мусобақалардан бунчалик катта таассурот олмаганман. Уларга бизни шунчалик кўтаринки руҳда қўллаб туришгани учун раҳмат айтаман”.
Фурсатдан фойдаланиб, биз ҳам ҳар икки спортчимизга келгуси фаолиятларида бундан ҳам улкан ютуқларни қўлга киритишларини тилаб қоламиз.
