Шундан сўнг Азиз Абдуҳакимов мусобақани расман очиқ деб эълон қилди ва Ўзбекистон Республикаси давлат мадҳияси янгради.
Шунинг билан мусобақанинг тантанали очилиш маросими ўз якунига етди.
Маълум қилганимиздек, бугун пойтахтимизда оғир атлетика бўйича катталар ўртасидаги жаҳон чемпионати старт олди. Айни дақиқаларда мазкур мусобақанинг тантанали очилиш маросими бўлиб ўтди.
Маросимда Ўзбекистон Республикаси Бош вазирининг ўринбосари, Туризм ва спорт вазири Азиз Абдуҳакимов, МОҚ раҳбари Рустам Шоабдураҳмонов, Ўзбекистон Республикаси Қурилиш вазири, Ўзбекистон оғир атлетика федерацияси раиси Ботир Зокиров, Ўзбекистон оғир атлетика федерацияси раисининг биринчи ўринбосари, Осиё оғир атлетика федерацияси вице-президенти Шаҳрулло Маҳмудов, Халқаро оғир атлетика федерацияси раҳбарлари, кўп сонли мухлислар ва мусобақада иштирок этаётган делегациялар қатнашишди.
Маросим аввалида Президентимиз ва ҳукуматимиз томонидан спортга қаратилаётган юксак эътибор ҳақидаги видеоролик меҳмонларга тақдим қилинди. Шундан сўнг саҳналаштирилган турли бадиий чиқишлар йиғилганлар эътиборига ҳавола этилди. Айниқса, Ўзбекистонда хизмат кўрсатган артист Шукурулло Исроилов, Ўзбекистон ва Қорақалпоғистон халқ артисти Женисбек Пиязов, «Ситора» гуруҳи иштирокидаги чиқиш йиғилганларга юқори кайфият улашди.
“Авваламбор, Ўзбекистон Республикаси Президенти Шавкат Мирзиёевга ушбу мусобақани юқори савияда ташкиллаштиришда бош бўлгани учун федерациямиз номидан миннатдорчилик билдириб қоламан. Шунингдек, Туризм ва спорт вазирлиги, Миллий Олимпия қўмитаси, Ўзбекистон оғир атлетика федерацияси ҳам ташкилий ишларни юқори савияда амалга оширишди. Расмий маълумот бўйича, ушбу дунё биринчилигида 90 га яқин мамлакатдан 500 нафарга яқин спортчи иштирок этмоқда. Фурсатдан фойдаланиб, бугунги мураккаб даврда барчангизга сиҳат-саломатлик тилаб қоламан. Мусобақа давомида ҳам ижтимоий масофа сақланиб, барча талабларга риоя қилинишини сўрайман”, – деди Майкл Ирани.
Мамлакатимиз номидан Азиз Абдуҳакимов сўзга чиқиб, мусобақа иштирокчиларига самимий қутловларини йўллади:
“Барчангизни гўзал диёримизда илк бор ўтказилаётган жаҳон чемпионатида кўриб турганимиздан хурсандмиз. Мамлакатимизда ҳурматли Президентимиз раҳбарлигида жисмоний тарбия ва спортни ривожлантиришга катта аҳамият қаратилмоқда. Шу билан бирга, юртимизда нуфузли мусобақаларни қабул қилиш орқали Янги Ўзбекистоннинг имкониятларини кўрсатмоқдамиз. Шунингдек, спортчиларимиз халқаро майдонда улкан ютуқларга эришиб келишмоқда. Биргина оғир атлетика мисолида сўнгги икки Олимпия ўйинларида вакилларимиз олтин медални қўлга киритиб келаётгани, яқинда Саудия Арабистонида ўтган ўсмирлар ўртасидаги жаҳон чемпионатида ёшларимиз кучли учликдан ўрин олгани ушбу гапимизнинг яққол исботи бўла олади. Дунё биринчилигининг барча иштирокчиларига омад тилайман”.
Шундан сўнг Азиз Абдуҳакимов мусобақани расман очиқ деб эълон қилди ва Ўзбекистон Республикаси давлат мадҳияси янгради.
Шунинг билан мусобақанинг тантанали очилиш маросими ўз якунига етди.