Уч минтақа вакиллари Тошкентда
Эртага пойтахтимизда қиличбозлик бўйича Осиё, Пан Америка ва Африка конфедерацияларининг раҳбарлари иштирокида халқаро конференция бўлиб ўтади. Бугун мазкур тадбир иштирокчилари МОҚда меҳмон бўлишди.
Уларни Қўмита раҳбари Рустам Шоабдураҳмонов ва унинг ўринбосари Шерзод Ташматов қарши олишди. Даставвал, меҳмонларга МОҚ биноси бўйлаб экскурсия ташкил этилди, уларга ўзбек спортининг шонли тарихи, Президентимизнинг соҳага қаратаётган эътибори хусусида гапириб берилди. Шундан сўнг кичик мажлислар залида бир қатор истиқболли масалалар муҳокама қилиб олинди.
Таъкидлаш жоиз, делегация таркибида Пан Америка қиличбозлик конфедерацияси президенти Виталий Логвин, Африка қиличбозлик конфедерацияси президенти Мбагник Ндиайе, Осиё қиличбозлик конфедерацияси президенти вазифасини бажарувчи Русни Абу Ҳасан, шунингдек, Миср, БАА, Иордания қиличбозлик федерациялари раҳбарлари иштирок этишди.
Суҳбат давомида Рустам Шоабдураҳмонов ўзбек қиличбозлигининг йилдан йилга ривож топиб бориши, эришаётган ютуқлари, бунда давлатимизнинг қўллаб-қувватлаши ҳақида гапириб берди.
“Ҳаммангизни азим пойтахтимизда кўриб турганимиздан бағоят мамнунмиз. Барча муваффақиятларимизга давлатимиз раҳбарининг спортга қаратаётган эътибори билан эришмоқдамиз. Жумладан, Токиода илк бор қиличбозлик спортида 3 та йўлланмага эга бўлдик. Улар орасида 18 ёшли саблячи қизимиз кучли саккизликдан жой олди. Биз мезбонлик қилаётган турли йирик халқаро тадбирлар ҳам ҳукуматимизнинг қўллаб-қувватлаши билан ўтмоқда. Мақсад эса мамлакатимизда спорт тарғиботини янада кучайтириш”, – деди МОҚ раҳбари.
Тадбир давомида БАА ва Миср вакилларидан ўзаро ҳамкорлик ривожини янги босқичга олиб чиқиш, эришилган сўнгги ютуқлар билан ўртоқлашиш мақсадида ҳамкорлик меморандумини имзолаш бўйича таклиф билдирилди. Шунингдек, қиличбозлик истиқболига оид бир қатор масалалар атрофлича муҳокама этилди.
Якунда меҳмонларга МОҚнинг эсдалик совғалари тақдим этилди.
Куннинг иккинчи ярмида меҳмонлар пойтахтимизда қад ростлаётган Ислом цивилизацияси марказига ташриф буюриб, у ерда қад ростлаётган ислом оламининг энг йирик замонавий марказларидан бирида олиб борилаётган қурилиш ишлари билан танишишди.
