Сакен Полатов Ўзбекистон терма жамоаси боксчилари билан учрашув ўтказди
Токио-2020 Олимпиадаси ўз ниҳоясига етди. Демак, бизда янги цикл бошланди. Олимпиада якунига етгач, ўз-ўзидан навбатдаги мусобақаларга тайёргарлик бошлаб юборилди. Ўзбек боксчиларини олдинда кўплаб мусобақалар кутиб турибди.
Бугун навбатдаги мусобақалар олдидан МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов терма жамоамиз аъзолари билан учрашиб, улар билан суҳбатлашди.
Йиғилиш давомида эндиликда терма жамоада ишни ташкил этишда киритиладиган ўзгаришлар, олдиндаги режалар ва бошқа масалалар гаплашиб олинди. Йиғилиш давомида федерация раҳбари барча учун имконият борлиги ҳақида гапирди.
«Эндиликда терма жамоа таркиби бир неча мутахассисдан ташкил топган мураббийлар кенгаши қарорига кўра аниқланади. Терма жамоа учун йиғинлар сони кўпайтирилади. Барчангизда ўз олдингизга қўйган мақсадингиз бор. Унга эришиш учун эса фақат ва фақат меҳнат қилишингиз лозим. Бу ерда ўтирган барча боксчилар Париж-2024 Олимпиадаси, жаҳон чемпионатлари учун потенциал номзод ҳисобланишади. Сиздан талаб қилинадигани фақат интизом ва меҳнат. Мусобақаларга ким кучли бўлса ўша боради. Таркиб танлашда номларга қараб ўтирмаймиз. Барчада имконият бор. Шуни ҳис қилишингизни истардимки, муҳтарам юртбошимиз Шавкат Миромоновичнинг боксга эътиборлари бошқача. Биз ушбу эътиборга юксак натижаларимиз билан жавоб қайтаришимиз лозим«, – деди Сакен Полатов.
Йиғилиш давомида шунингдек, кенгайтирилган таркиб аниқлаб олингани маълум қилинди. Бу йил ўтадиган жаҳон чемпионати 13 та вазн тоифасида ўтказилиши яна бир бора эслатиб ўтилди. Учрашувда терма жамоамиз сардори Баҳодир Жалолов ва яна бир неча боксчиларимиз сўзга чиқиб, ўз фикрларини билдириб ўтишди.
Ўзбекистон бокс федерацияси матбуот хизмати
