Юртдошларимиз Никита Рафалович ва Светлана Осипованинг шиддатли жангларидан суратлар. Афсуски, Рафалович илк даврадаёқ имкониятни бой берди, Осипова эса африкалик рақибасини мағлуб этиб, чорак финал йўлланмасини қўлга киритди.
Акбар Жўраев бугун бор куч ва имкониятларини ишга солиб, делегациямизга Париж-2024 ёзги Олимпия ўйинларининг дастлабки кумуш медалини тақдим қилди. Тақдирлаш маросимидан сўнг делегациямиз расмийлари Акбар Жўраевни фаолиятидаги иккинчи Олимпиада медали билан қутлашди.
Светлана Осипованинг ўзбек таэквондосида янги саҳифа очган баҳсидан ёрқин галерея
Мухлисларнинг тинимсиз босимига қарамай Ҳасанбой Дўсматов аниқ ва кучли зарбалари, чаққон ҳаракатлари билан тарихий финални ўз фойдасига ҳал қилди. Андижон ўғлони икки карра Олимпиада чемпионлигига эришган биринчи ўзбек боксчисига айланди. Тасанно, Ҳасанбой!
Бокс бўйича Ўзбекистон терма жамоаси ҳисобига бешинчи финал йўлланмасини тақдим қилган Абдумалик Халоковнинг жангидан ёрқин суратлар
22 ёшида 2 карра Олимпиада чемпионлигини қўлга киритган Улуғбек Рашитовнинг финал жанги ва тақдирлаш маросимидан суратлар
Ўтган Олимпиада финалчисини очко бермасдан мағлуб этган Разамбек Жамалов потенциали анча юқори эканини яна бир карра кўрсатди. Бўлажак баҳсларда ҳам терма жамоамиз вакилига ёрқин ғалабалар тилаб қоламиз.
Илк сонияларда олинган жароҳат Рустам Ассакаловни Олимпиада медалидан айирди. Мазкур беллашувдан сўнг 40 ёшли курашчимиз профессионал спортдаги фаолиятини якунлади. Рустам Ассакалов Ўзбекистон терма жамоаси таркибида жаҳон чемпионатларида 1 тадан олтин ва кумуш, Осиё ўйинларида 1 тадан олтин, кумуш ва бронза, қитъа биринчиликларида эса 3 та олтин, 2 та кумуш ва 2 та бронза медалларига сазовор бўлган. Шунингдек, Рио-2016, Токио-2020 ва Париж-2024 ёзги Олимпия ўйинларида юртимиз шарафини муносиб ҳимоя қилди. Ўзбекистон Миллий Олимпия қўмитаси Рустам Ассакаловга ёрқин фаолият учун миннатдорчилик билдириб, унга келгусида сиҳат-саломатлик ва муваффақиятлар тилайди.
Арам Варданян бронза медали учун баҳсда бор имкониятини ишга солди. Афсуски, атиги бир балл юртдошимизни Олимпиада медалидан ажратиб қолди. Собиқ жаҳон чемпионига қарши кечган баҳс Анвар Ильясов суратларида
Баҳодир Жалолов ярим финал баҳсини яққол устунлик билан ўтказди. Германиялик боксчи учун мазкур жанг чинакам тажриба вазифасини ўтаб берди. Беллашувдан ёрқин суратлар:
Халқаро Олимпия қўмитаси (ХОҚ) президенти Томас Бах, Бутунжаҳон таэквондо федерацияси президенти Чунгвон Чои, Ўзбекистон Республикаси Спорт вазири Адҳам Икрамов ҳамда МОҚ Бош котиби Ойбек Касимов Улуғбек Рашитов иштирокидаги жангни биргаликда томоша қилишди. Баҳс якунида ХОҚ раҳбари ҳамюртимизга келгуси босқичларда ҳам омад тилади.
Улуғбек Рашитов ўзбек спорти тарихида яна бир янги саҳифа очиш арафасида. Финал йўлида жиддий рақиб, испаниялик Хавер Перес мағлуб этилган баҳс Анвар Илясов суратларида.