Бугунги қаҳрамонимиз – Оксана Чусовитина
Ўзбекистон Миллий Олимпия қўмитаси кўпчиликнинг қизиқишига сабаб бўлган “Улар Токиода юрт шарафини ҳимоя қилишади” лойиҳасини давом эттиради. Унинг бугунги қисми ўзбек ва жаҳон спортининг афсонаси Оксана Чусовитинага бағишланади.
Оксана Александровна Чусовитина 1975 йил 19 июнь куни Бухоро шаҳрида туғилган. Жаҳонда спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016). 1992 йил Барселонада ўтган Олимпия ўйинлари олтин медали соҳиби, 3 карра жаҳон чемпиони.
Оксана Чусовитина спорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасининг сир-асрорларини ўрганиб келган. 1990 йил терма жамоа аъзосига айланган.
Таяниб сакраш, эркин машқ ва параллель тўсинларда бир неча мураккаб элементлар муаллифи. Қаҳрамонимиз Осиё ўйинлари ва Осиё чемпионати ғолиби, фаолиятини якунламасдан туриб, гимнастиканинг ривожига қўшган ҳиссаси учун Халқаро гимнастика шон-шараф залидан ўрин олган ягона спортчи ҳисобланади. У, шунингдек, спорт гимнастикасида Олимпия ўйинларида энг кўп иштирок этгани учун “Гиннеснинг рекордлари” китобига ўз номини ёздириб қўйган.
2019 йил Германиянинг Штутгарт шаҳрида ўтказилган спорт гимнастикаси бўйича жаҳон чемпионатидаги иштироки орқали Токио-2020 Олимпия ўйинларига йўлланма олди. Токио Олимпиадаси Чусовитина учун фаолиятидаги саккизинчи Олимпиада бўлади. Оксана Александровна фаолияти давомида қуйидаги унвонларга сазовор бўлган:
1991 йил: Собиқ Иттифоқда хизмат кўрсатган спорт устаси
1992 йил: Ўзбекистон Республикасида хизмат кўрсатган спортчи
Давлат мукофотлари:
1996 йил: “Дўстлик” ордени
2001 йил: “Меҳнат шуҳрати” ордени
2017 йил: “Эл-юрт ҳурмати” ордени
2020 йил: Ўзбекистон ифтихори фахрий унвони
