Rossiyaning Moskva shahrida joylashgan “Maxima stables” ot sporti klubida konkur bo‘yicha Yevrosiyo chempionatida kuchlilar saralandi.

Musobaqaning asosiy dasturi hisoblanmish Gran-pri yo‘nalishi hamyurtlarimiz uchun omadli keldi. 145 sm balandlikdagi to‘siqlardan o‘tish bo‘yicha kechgan bahsda hamyurtlarimiz oltin va kumush medallarga sazovor bo‘lishdi. Bu borada Umid Komilov eng yaxshi natijani qayd etgan bo‘lsa, Nurjan Tuyakbayev ikkinchi bo‘ldi.

Shuningdek, “Kolorado” tulporida ishtirok etgan Tuyakbayev 130 sm balandlikdagi to‘siqlardan o‘tish dasturida ikkinchi bo‘ldi. Ushbu yo‘nalishda ishtirok etgan Bahromjon Gaziyev kuchli beshlikni yakunlab berdi. Shuningdek yoshlar o‘rtasida kechgan 115 smli to‘siqlarda Bobur Valijonov ham beshinchi natijani qayd etdi.