8-mart – Xalqaro xotin-qizlar kuni munosabati bilan bugun Toshkent fotosuratlar uyida “Sport tarixida matonatli ayol timsoli” nomli fotokoʻrgazma tashkil qilindi. “Oʻzbek ayoli – oʻtmish, nafosat, kelajak ramzi” shiori ostida oʻtgan tadbirda MOQ hamda boshqa hamkor tashkilotlar vakillari, tennisimiz malikasi Iroda Toʻlaganova hamda yosh sportchi qizlar ishtirok etishdi.

Oʻzbekiston Respublikasi Adliya vazirligi huzuridagi “Oʻzarxiv” agentligi, Oʻzbekiston Badiiy akademiyasi, Oʻzbekiston Milliy axborot agentligi hamda Sport vazirligi hamkorligida tashkil etilgan koʻrgazmada 1930-yillardan boshlab bugungi kungacha boʻlgan davrda ayol atletlarimizning oʻzbek sportidagi oʻrni ochib berilgan. Oʻtgan asrda oʻtkazilgan spartakiadalar, yaqin yillarda sportchi qizlarimizning yirik kompleks musobaqalar – Osiyo va Olimpiya oʻyinlaridagi ishtiroki aks etgan suratlar tashrif buyuruvchilarda katta qiziqish uygʻotdi.

Koʻrgazma nafaqat ayol atletlarimizning yutuqlari, ularning mamlakat sportini rivojlantirishga qoʻshgan hissasinigina ifodalab qolmasdan, irodali sportchi qizlarning yangi avlodini ruhlantirishga, ularda vatanparvarlik tuygʻusini yuksaltirishga xizmat qiladi.