Yilqichilik va ot sporti hamda zamonaviy beshkurash federatsiyalarida yil sarhisobi oʻtkazildi
Poytaxtimizdagi “Markaziy temiryoʻlchilar madaniyat saroyi”da Oʻzbekiston yilqichilik va ot sporti hamda zamonaviy beshkurash federatsiyalarining yil yakunlariga bagʻishlangan hisobot-saylov konferensiyasi boʻlib oʻtdi. Unda mazkur federatsiyalarning ortda qolgan Olimpiya yilidagi faoliyati sarhisob qilinib, federatsiyalar rahbariyati tarkibida baʼzi oʻzgarishlar amalga oshirildi.
Xususan, Rustam Hasanov va Shuhrat Latifov Oʻzbekiston yilqichilik va ot sporti federatsiyasi raisining oʻrinbosari, Rahmatjon Rustamov esa zamonaviy beshkurash federatsiyasi raisining oʻrinbosari lavozimiga saylanishdi. Bahromjon Gaziyev esa mamlakat zamonaviy beshkurash federatsiyasi raisi lavozimiga qayta saylandi.
Shuningdek, turli yoʻnalishlar boʻyicha yilning eng yaxshilari ham aniqlab olindi. Unga koʻra, Samira Abzalova hamda Doniyor Rahimov yilning eng yaxshi beshkurashchisi deb topilgan boʻlsa, Feruza Abdullayeva ot yoʻrttirish, Xurshidbek Alimjonov konkur va Jasurbek Xotambekov uchkurash yoʻnalishida eng yaxshi sportchi deb topildi. Oltin taqa sovrini esa “Alise G” tulporiga nasib etdi.
