Italiya ot sporti federatsiya bilan hamkorlik yangi bosqichga chiqmoqda
Ayni kunlarda Italiyaning Verona shahrida “Fieracavalli” xalqaro koʻrgazmasi boʻlib oʻtmoqda. Ot sporti olamidagi yirik tadbirda Bahromjon Gaziyev boshchiligidagi Oʻzbekiston yilqichilik va ot sporti federatsiyasi mutasaddilari ham qatnashishyapti.
126 yildan beri tashkil etilayotgan mazkur koʻrgazma milliy federatsiyalar oʻrtasidagi oʻzaro aloqalarini mustahkamlash, sohada erishilayotgan yangi yutuqlar yuzasidan tajriba almashish imkonini beradi. Shu bois ushbu tadbir rivojlanishning yangi darajasiga olib chiqadigan muhim platforma boʻlib xizmat qiladi.
Bahromjon Gaziyev safar davomida Italiya ot sporti federatsiyasi prezidenti Marko di Paolo hamda Bosh kotib Simone Perillo bilan rasmiy uchrashuv oʻtkazdi. Unda oʻzaro hamkorlik aloqalarini yanada mustahkamlash, musobaqalar tashkil etish, zotdor otlarni koʻpaytirish borasida tajriba almashish kabi masalalar yuzasidan fikr almashildi.
Koʻrgazma davomida Oʻzbekiston burchagi ham tashkil etilib, unda tashrif buyuruvchilar mamlakatimizda ot sporti rivojiga oid maʼlumotlar bilan tanishish barobarida, yurtimiz mezbonlik qilayotgan xalqaro musobaqalardan lavhalarni tomosha qilish imkoniyatiga ham ega boʻlishdi.
