Xarbin qishki Osiyo oʻyinlari ishtirokchilarini chorlaydi
2025-yilning 7-14-fevral kunlari Xitoyning Xarbin shahrida IX qishki Osiyo oʻyinlari boʻlib oʻtadi. Shu munosabat bilan 23-25-sentyabr kunlari Xarbinda boʻlajak musobaqa oldidan delegatsiya vakillari uchun seminar tashkil etildi. Unda Oʻzbekiston Milliy Olimpiya qoʻmitasi xodimlari ham qatnashishdi.
Seminarda tashkiliy qoʻmita Oʻyinlarni oʻtkazish boʻyicha batafsil maʼlumot berdi. Xitoy tomoni bellashuvlar Xarbin va Yabuli shaharlarida tashkil etilishi bildirdi. Rejaga koʻra, Xarbinda muz ustida kechadigan bahslar oʻtkazilsa, Yabulida ochiq havodagi bellashuvlar tashkil qilinadi.
Seminar davomida mehmonlar musobaqa oʻtkaziladigan obyektlar, delegatsiya aʼzolari yashaydigan mehmonxonalarga tashrif buyurib, yaratiladigan sharoitlar bilan tanishdi.
Qayd etish joiz, Oʻyinlar davomida tashrif buyuruvchilar uchun turli koʻngilochar dasturlar tashkil etilishi ham rejalashtirilgan. Ulardan biri har yili Xarbinda oʻtkaziladigan muz haykallar festivali boʻlib, bu Oʻyinlarning alohida tashrif qogʻoziga aylanishi kutilmoqda.
