O‘zbekiston Butunjahon shaxmat Olimpiadasining bronza medali sohibi!
Vengriyaning Budapesht shahrida 45-Butunjahon shaxmat Olimpiadasi oʻz yakuniga yetdi. Quvonarlisi, unda ishtirok etgan Oʻzbekiston erkaklar terma jamoasi bronza medaliga sazovor boʻldi.
Murosasiz bahslarda gʻoliblik Hindiston jamoasiga nasib etgan boʻlsa, AQSh grossmeysterlari kumush medallar bilan taqdirlanishdi.
Individual yoʻnalishlarda ham yurtdoshlarimiz sovrinlarga ega chiqishdi:
1. Shamsiddin Vohidov (4-taxta)
2. Nodirbek Abdusattorov (1-taxta)
2. Nodira Nodirjonova (5-taxta)
Qayd etish joiz, hamyurtlarimiz 2 yil muqaddam Hindistonda oʻtgan Olimpiadada chempionlikka erishgan edi. Shu tariqa, jamoamiz qatorasiga ikkinchi bor sovrindor boʻlmoqda. Endi yana 2 yildan soʻng dunyoning eng kuchli grossmeysterlari Oʻzbekiston mezbonlik qiladigan navbatdagi Olimpiadada jam boʻlishadi.
Oʻzbekiston Milliy Olimpiya qoʻmitasi ushbu muvaffaqiyat bilan mamlakat shaxmat federatsiyasi, sportchi va murabbiylarimizni, mazkur sport muxlislarini samimiy qutlaydi.
