Og‘ir atletikachilarimiz so‘nggi yig‘inga kirishishdi
Xabar berganimizdek, kuni kecha og‘ir atletika bo‘yicha O‘zbekiston terma jamoasi Tokio-2020 Olimpiadasiga tayyorgarlik doirasida so‘nggi o‘quv-mashg‘ulot yig‘iniga jo‘nab ketgan edi. Terma jamoamiz mo‘ljallangan Ukrainaning Kamenes-Podolskiy shahriga yetib bordi.
Yig‘inga 8 nafar sportchi, 2 murabbiy va 1 massajchi jalb qilingan. Mashg‘ulotlar murabbiylar shtabining rejasi asosida olib borilmoqda. Avval xabar berganimizdek, bu yig‘indan so‘ng jamoamiz 20 iyul kuni Ukrainadan to‘g‘ri Yaponiyaga yo‘l olishadi. Shu bois kuniga 2 mahal olib borilayotgan mazkur mashg‘ulotlarning ahamiyati katta.
Tokio-2020 Olimpiadasida ishtirok etmaydigan vakillarimizning yig‘ini 29 iyul kuniga qadar davom etadi. Maʼlumot uchun, bo‘lajak Olimpiadada Akbar Jo‘rayev, Adhamjon Ergashev, Muattar Nabiyeva hamda Kumushxon Fayzullayeva yurtimiz sharafini himoya qilishadi.
