Parij-2024 yozgi Olimpiya oʻyinlariga yoʻllanma olgan akademik eshkak eshish boʻyicha Oʻzbekiston terma jamoasi aʼzolari ayni kunlarda Litvada xalqaro oʻquv-mashgʻulot yigʻinini oʻtkazishmoqda. Trakay shahri mezbonlik qilayotgan yigʻin 19-iyulga qadar davom etib, sportchilarimiz uchun Olimpiada yoʻlidagi asosiy tayyorgarlik vazifasini oʻtab beradi.

Eslatib oʻtamiz, akademik eshkak eshuvchilarimizdan Sobirjon Safaraliyev, Shahzod Nurmatov va Anna Prakaten 4-yillikning eng nufuzli musobaqasida ishtirok etish huquqini qoʻlga kiritishgan edi. Olimpiada doirasida mazkur sport turidagi bellashuvlar 27-iyul – 3-avgust sanalarida boʻlib oʻtadi.