Kanadaning Vankuver shahrida suzish boʻyicha xalqaro musobaqa boʻlib oʻtmoqda. Ahamiyatlisi, unda ishtirok etayotgan Oʻzbekiston terma jamoasi aʼzosi Ilya Sibirsev 800 metrga erkin usulda suzish bahsida oltin medalni qoʻlga kiritish barobarida Parij-2024 normativini ham bajarishga muvaffaq boʻldi. Yurtdoshimiz final dasturida 7:50.05 vaqt ichida marraga yetib kelgan. Mazkur dasturda normativ 7:51.65 ni tashkil etadi. Yana bir ahamiyatli tomoni, ushbu natija Sibirsevga Olimpiya dasturlaridagi yana bir masofada ishtirok etish imkoniyatini taqdim qiladi. Shu tariqa, hamyurtimiz ushbu natijasi evaziga 2 ta yoʻllanmaga sazovor boʻlmoqda.