Kamondan otish boʻyicha Oʻzbekiston terma jamoasining Parij-2024 yozgi Olimpiya oʻyinlariga 3 ta yoʻllanma qoʻlga kiritishi barcha muxlislarimizni quvontirgani, shubhasiz. Bundan ruhlangan Oʻzbekiston kamondan otish federatsiyasining rasmiy homiysi “Asialuxe Travel” kompaniyasi Oʻzbekiston Respublikasi Milliy Gvardiyasi va mamlakat kamondan otish federatsiyasi bilan hamkorlikda sportchilarimiz uchun fotosessiya tashkil qildi.

Merganlarimiz yildan yilga xalqaro musobaqalarda yuqori natijalarni koʻrsatib kelishmoqda. Xususan, Osiyo kubogi bosqichlari va boshqa nufuzli xalqaro musobaqalarda muntazam ravishda shohsupaga koʻtarilishyapti. Ziyodaxon Abdusattorova 2023-yilning noyabr oyida Tailandda oʻtgan qitʼaviy litsenzion turnirda muvaffaqiyatli ishtirok etib, mazkur sport turida Olimpiya oʻyinlariga yoʻllanma olgan birinchi oʻzbekistonlik sportchi sifatida tarixda qoldi. Amirxon Sodiqov esa kuni kecha Turkiyadagi jahon litsenzion turnirida Parij-2024 yoʻllanmalariga sazovor boʻldi. Oʻz oʻrnida, Amirxon Sodiqovning Antalyada oʻtgan musobaqada barcha raqiblarini magʻlubiyatga uchratib, oltin medal sohibiga aylanganini alohida taʼkidlash oʻrinli.

Ushbu muvaffaqiyatlarda murabbiylar shtabining ham mehnatini alohida eslab oʻtish joiz. Malakali ustozlar merganlarimizning mahoratlarini yanada toblashmoqda. Bunda mahalliy va xalqaro oʻquv-mashgʻulot yigʻinlari, xalqaro turnirlardagi ishtiroki muhim ahamiyatga ega. “Asialuxe Travel” kompaniyasi jamoamizning mana shu jarayonda belgilangan manzilga yetib olishlarida katta yordam koʻrsatmoqda. Merganlarimizdan Parij-2024 yozgi Olimpiya oʻyinlarida ham yuksak natijalar kutib qolamiz va bu borada barcha sportchilarimizga omad tilaymiz.