Ayni kunlarda Xitoyning “CAMC Engineering” kompaniyasi Bosh direktori Li Xaysin Toshkentda mehmon boʻlib turibdi. Bugun Sport vazirligida Toshkent-2025 yoshlar Osiyo oʻyinlari uchun barpo etilayotgan Olimpiya shaharchasining bugungi holati va kelgusida kompleksdan samarali foydalanish masalasiga bagʻishlangan uchrashuv boʻlib oʻtdi.

Yigʻilishni vazir Adham Ikramov olib bordi. Unda, shuningdek, MOQ Bosh kotibi Oybek Kasimov va soha mutaxassislari ishtirok etishdi.

Uchrashuvda olib borayotgan bunyodkorlik ishlarining bugungi holati va qoʻshimcha quriladigan yana ikkita bino (tibbiyot markazi va 400 oʻrinli mehmonxona)ning loyihasi batafsil muhokama qilindi. Adham Ikramov kompleksning barpo etilishini davlatimiz har tomonlama qoʻllab-quvvatlayotgani, qurilish ishlari uzliksiz olib borilishi uchun barcha sharoit yaratib berilayotganini taʼkidladi. Janob Li hamkorlik Xitoy kompaniyasi uchun ham manfaatli boʻlayotgani, kelgusida ham qator loyihalarni birgalikda amalga oshirishdan mamnun boʻlishini bildirdi.

Yigʻilish doirasida Oybek Kasimov musobaqani oʻtkazish direksiyasining tashkiliy tuzilmasi va uning faoliyati haqida taqdimot oʻtkazdi. Suhbat davomida qurilish ishlarini jadallashtirish, barpo etilayotgan qoʻshimcha binolar va tashrif buyuruvchilar uchun koʻngilochar maydonlarining loyihasini takomillashtirish boʻyicha qoʻshimcha tavsiyalar berildi.