Qilichbozlik boʻyicha Oʻzbekiston terma jamoasi aʼzosi Zaynab Dayibekova ayni kunlarda Gruziyaning Tbilisi shahrida oʻquv-mashgʻulot yigʻinini olib bormoqda. Mazkur yigʻin sportchimizga Parij-2024 yozgi Olimpiya oʻyinlariga tayyorgarlikning muhim bosqichi boʻlib xizmat qilmoqda.

Dayibekovaga jamoa murabbiyi Vladimir Nazlimov hamda sparring sherik sifatida yana bir sportchimiz Musa Aymuratov hamrohlik qilmoqda. Rejaga koʻra, qilichbozlarimiz Olimpiya oʻyinlari oldidan 22-27-iyun kunlari Quvaytda oʻtadigan Osiyo chempionatida oʻz imkoniyatini sinovdan oʻtkazib oladi. Tbilisi yigʻini 16-iyunga qadar davom etadi.