BAAdan tashrif buyurgan sport shifokori mutaxassislarimiz bilan oʻz bilimlarini oʻrtoqlashmoqda
Parij-2024 yozgi Olimpiya oʻyinlari oldidan terma jamoalarimizda faoliyat olib borayotgan mutaxassislarning malakasini oshirish borasida qator tadbirlar oʻtkazilishi rejalashtirilgan. Bugun MOQda sport shifokorlari uchun moʻljallangan ana shunday seminarlardan biri boshlandi. Maʼruzalar BAAdan tashrif buyurgan malakali shifokor Sari Shayx Al Najjor tomonidan olib borilmoqda.
Rejaga koʻra, seminar 6-iyunga qadar davom etadi. Xorijlik ekspert ungacha manual terapiya sohasidagi koʻp yillik tajribalari borasida oʻz bilimlari bilan oʻrtoqlashadi. Bugun seminarning ilk qismida doktor Al Najjor oʻz faoliyati, sohadagi dolzarb mavzular boʻyicha gapirib oʻtdi.
Dasturga muvofiq, yana ikki kun davomida mutaxassislar MOQ qoshidagi Respublika sport tibbiyot ilmiy-amaliy markazida malaka oshirishadi. Amirliklardan tashrif buyurgan mehmon atletlarni reabilitatsiya qilish, manual terapiya borasidagi malakalari bilan oʻrtoqlashadi.
