Dzyudochilarimiz tog‘li Bakuriani yig‘inida
Dengiz sathidan 1700 metr balandlikda joylashgan Gruziyaning Bakuriani shahri o‘zining toza havosi, qulay iqlimi va shinam sport bazalari bilan mashhur. 24-may kuni og‘ir atletika bo‘yicha O‘zbekiston terma jamoasi ushbu maskanda o‘quv-mashg‘ulot yig‘inini tugatib yurtimizga qaytgan bo‘lsa, joriy haftadan dzyudochilarimiz Bakuriani yig‘iniga kirishdilar.
Ilias Iliadis boshchiligidagi O‘zbekiston erkaklar terma jamoasi a’zolari va Gulnoza Matniyazova jahon chempionatidan so‘ng to‘g‘ri Gruziyaga yo‘l olishgan. Yig‘inning dastlabki qismida mas’uliyatli musobaqadan so‘ng tiklanish jarayoni va yengil jismoniy yuklamalarga e’tibor qaratilmoqda. Rejaga ko‘ra, yigitlarimiz 11-iyun sanasigacha Bakurianida bo‘lishadi. Ayollar terma jamoamiz esa Toshkentda mashg‘ulotlarni davom ettiradi.
