Parij-2024 litsenziatlari: Sport otidagi mashq ustasi Abdulla Azimov
Boʻlajak Olimpiya oʻyinlarida yurtimiz sharafini himoya qiladigan atletlar bilan tanishtirishda davom etamiz. Bugungi qahramonimiz sport gimnastikasi bahslarida koʻpkurash dasturida yurtimiz sharafini himoya qiladigan Abdulla Azimov.
Azimov Abdulla Rustam oʻgʻli 1996-yil 20-mart kuni Toshkent shahrida dunyoga kelgan. 2012-yildan Oʻzbekiston terma jamoasi aʼzosi. Murabbiyi Yevgeniy Galkin. Inchxon-2014 yozgi Osiyo oʻyinlari va Konya-2021 Islom birdamligi oʻyinlarida kumush medalga sazovor boʻlgan. Qitʼa birinchiliklarida 2 ta kumush va 1 ta bronza, Jahon kubogi bosqichlarida 1 tadan oltin va kumush medallarini qoʻlga kiritgan. Hamyurtimizning eng sevimli yoʻnalishi sport otidagi mashq dasturi hisoblanadi.
Azimov joriy oy Toshkentda oʻtgan litsenzion Osiyo chempionatining koʻpkurash yoʻnalishida yoʻllanmasi yoʻq atletlar orasida eng yuqori ball jamgʻarib, Parij-2024 ishtirokchisiga aylandi.
