2023-yil Antverpenda oʻtgan sport gimnastikasi boʻyicha jahon chempionati hamyurtimiz Habibullo Ergashev uchun muvaffaqiyatli yakunlangan edi. Ergashevning ushbu dunyo birinchiligida koʻpkurash dasturidagi ishtiroki unga Parij-2024 eshiklarini ochdi.

Ergashev Habibullo Himoyatullo oʻgʻli 1999-yil 6-may kuni Fargʻona shahrida tavallud topgan. 2012-yildan Oʻzbekiston terma jamoasi aʼzosi. Murabbiyi Ravshanbek Mirzayev. Sportchimiz barcha snaryadlarda yuqori mahorat koʻrsata olsada, sport otidagi mashq uning eng sevimli yoʻnalishi hisoblanadi. Konya-2021 Islom birdamligi oʻyinlarida va kuni kecha Toshkentda oʻtgan Osiyo chempionatida jamoaviy dasturda kumush medal bilan taqdirlangan. Bir necha nufuzli xalqaro musobaqalarda gʻolib va sovrindorlar qatorida joy olgan.

Ergashev Xalqaro gimnastika federatsiyasi (FIG) tomonidan 2023-yilgi Jahon chempionati yakuniga koʻra eʼlon qilingan reyting orqali Parij-2024 yozgi Olimpiya oʻyinlari yoʻllanmasini qoʻlga kiritgan.