Taekvondochilarimizdan ikkinchi kunda uchta medal
Vyetnamda taekvondo WT boʻyicha Osiyo chempionatining ikkinchi kuni ortda qoldi. Qayd etish joiz, bugungi bellashuvlar Oʻzbekiston terma jamoasi uchun ancha sermahsul oʻtdi. Kun davomida ishtirok etgan hamyurtlarimiz 1 ta kumush va 2 ta bronza medallariga sazovor boʻlishdi.
Feruza Sodiqova (-62 kg) ketma-ket uchinchi bor qitʼa birinchiligida shohsupaga koʻtarildi. Jahon chempionatlarining ikki karra sovrindori bugun finalda imkoniyatni boy berib, kumush medal bilan taqdirlandi. Shuningdek, yarim finalgacha yetib borgan Najmiddin Qosimhojiyev (-74 kg) hamda Gulsanam Alijonova (-73 kg) bronza medallarini qoʻlga kiritishdi. Bu har ikki sportchimiz uchun Osiyo chempionatlaridagi birinchi medal hisoblanadi.
Shu tariqa, terma jamoamiz jamgʻargan medallar hozircha 1 ta kumush va 3 ta bronzaga yetdi. Musobaqa davom etadi.
