Bugun erkin kurash ustalari ham bahslarga kirishadi
Bugun Turkiyada sport kurashlari boʻyicha jahon litsenzion musobaqasining uchinchi kun bellashuvlari boʻlib oʻtadi. Ushbu kun dasturida erkin kurash ustalari dastlabki bosqichdan bahslarga kirishishsa, ayollar kurashida soʻnggi yoʻllanmalar oʻynaladi. Erkin kurashchilarimizdan bugun uch nafar polvonimiz gilamga chiqib, musobaqani quyidagi raqiblariga qarshi boshlashadi:
-65 kg: Umidjon Jalolov – Sujit Kalkal (Hindiston)
-97 kg: Magomed Ibragimov – Adlan Visxanov (Fransiya)
-125 kg: Hasanboy Rahimov – Paris Karepi (Albaniya)
Kechagi bahslarda Shohida Ahmedova (-53 kg) hamda Laylo Sobirovani (-57 kg) magʻlubiyatga uchratgan raqiblari finalgacha yetib bordi. Shu bois endi hamyurtlarimiz dastlab bronza medali uchun, soʻng uchinchi oʻrin egalari oʻrtasida hal etiladigan yagona litsenziya uchun kurash olib borishadi.
